Björgunarsveitir víða að störfum

Björgunarsveitarmenn þurftu að aðstoða fólk í föstum bílum á Öxnadalsheiði, Þröskuldum, Fróðárheiði, í Gilsfirði og Svínadal í Dölum og jafnvel víðar, í gærkvöldi og fram á nótt. Ekki er vitað til að nokkur hafi lent í alvarlegum hrakningum.

Snjóflóð féll á Siglufjarðarveg í Mánaskriðum í gærkvöldi og lokaði veginum, en engin bíll var þar á ferð þegar það féll. Ekki verður reynt að ryðja það fyrr en búið verður að meta frekari flóðahættu í birtingu.

Vegir eru víða þungfærir eða ófærir allt frá Snæfellsnesi til Austfjarða og búist er við snjókomu eða éljum norðanlands í dag. Sumstaðar viðrar þannig að vegagerðarmenn geta ekki hafið mokstur og spáð er stormi á Suðurlandi, Vestfjörðum, við Breiðafjörð og við Suðausturströndina í dag.

Sáralítil umferð var á þjóðvegunum í nótt og á Vestfjörðum og Noðrausturlandi hafði engin bíll farið um marga helstu vegi fjórðunganna frá miðnætti til klukkan sex í morgun, samkvæmt teljurum Vegagerðarinnar.