Stjórnin í Sviss boðar frumvarp fyrir áramót

Stjórnvöld í Sviss eru ekkert að flýta sér að setja lög um kvóta á innflytjendur, þótt þjóðin hafi samþykkt slíkt í atkvæðagreiðslu um helgina.

Lagafrumvarp með útfærslu kvótans verður tilbúið fyrir áramót, en jafnframt ætla stjórnvöld að ráðgast við Evrópusambandið um áhrif á tvíhliða samninga, sem meðal annars fela í sér ákvæði um frjálsa för fólks milli landa.

Stjórn landsins segir að nauðsynlegt verði að semja upp á nýtt við ESB um landamæri og skýra ýmislegt annað í samskiptunum við ESB.

Í þjóðaratkvæðagreiðslu um helgina var samþykkt að strangar reglur um fjölda innflytjenda verði látnar taka gildi eftir þrjú ár.