Vatnið á Reykhólum sýður við 70 gráður

Flest höfum við lært að vatn sjóði við hundrað gráður. Í nýju saltverksmiðjunni á Reykhólum er hins vegar búið að komu upp aðstæðum þar sem suðumark vatns er fært niður í sjötíu gráður en þannig tekst að varðveita helstu snefilefni við saltvinnsluna.

Saltvinnslan hófst á Reykhólum í haust en fyrirtækið Norður og Co nýtir sér sjötíu stiga heitt afgangs jarðhitavatn frá Þörungaverksmiðjunni til að eima sjóinn úr Breiðafirði þannig að saltið skiljist frá. Efnaferlið fer fram í lokuðu kerfi, þar sem loftþrýstingur er lækkaður til að ná fram lægra suðumarki.

Framkvæmdastjórinn, Garðar Stefánsson, lýsir aðferðinni í viðtali í fréttum Stöðvar 2 en eftir því sem hann veit best til er þetta í fyrsta sinn sem salt er framleitt með þessum hætti í heiminum.

En fleira vinnst með þessari aðferð. Steinefni varðveitast betur í saltinu.

Garðar segir samskonar aðferð lengi hafa verið notaða við að vinna vatn úr sjó með því að skilja saltið frá. Hér sé þessu snúið við. Vatnið sé skilið frá en saltið verður eftir.