Stútur sýndi lögreglu mótþróa

Lögreglan á höfuðborgarsvæðinu stöðvaði ökumann í Breiðholti í gærkvöldi þar sem ökulag hans var ekki sem skyldi. Hann reyndist í mjög annarlegu ástandi, að sögn lögreglu, vegna neyslu fíkniefna og áfengis og sýndi hann lögreglu mótþróa.

Í ljós kom að hann var réttindalaus eftir að hafa misst þau fyrir samskonar brot áður, og fíkniefni fundust auk þess í fórum hans. Hann gistir fangageymslur og verður yfirheyrður í dag. Annar var tekinn úr umferð vegna fíkniefnaaksturs, en hann var ekki eins illa á sig kominn.