Hvetja launþega til að gefa til Hringsins

Allir launþegar eru hvattir til að gefa andvirði klukkustundar vinnu í söfnunina Gerðu góðverk - gefðu klukkustund í kynningarmyndbandi átaksins. Söfnunin er liður átaksins Öll í einn hring, sem er söfnun til tækjakaupa fyrir Barnaspítala Hringsins.

Nokkrir þjóðþekktir einstaklingar, eins og Rikka, Ari Eldjárn, Þorsteinn Guðmundsson, Pétur Jóhann og Jógvan, lögðu átakinu lið með að gefa vinnu sína við myndbandið sem vekja á athygli á málstaðnum. Meistaranemar í námskeiðinu Samvinna og árangur standa að átakinu.

Forsvarsmenn átaksins hafa fengið Hamborgarafabrikkuna í lið við sig og munu fá afnot af hamborgarabílnum á morgun. Hamborgarar verða seldir á háskólasvæðinu frá 11:30 til 13:00 á morgun og mun allur ágóði renna til barnaspítalans. Nemendur Háskóla Reykjavíkur verða ferjaðir yfir til Háskóla Íslands í hádeginu á morgun.

Frekari upplýsingar um Öll í einn hring er hægt að sjá á heimasíðu söfnunarinnar.

Kynningarmyndbandið er hægt að sjá hér að neðan.