TM sýknað af kröfu Lárusar Welding og tveggja annarra Glitnismanna

Sjö manna Hæstiréttur sýknaði í gær Tryggingamiðstöðina af kröfum Lárusar Welding, fyrrum forstjóra Glitnis, Jóns Sigurðssonar og Þorsteins M. Jónssonar, sem báðir voru stjórnarmenn í Glitni, um að viðurkennt yrði að ákveðinn skilmáli stjórnendatryggingar sem Glitnir keypti af TM næði yfir kröfur Glitnis banka gegn þeim auk málskostnaðar vegna málaferla bankans gegn þeim árið 2010.

Þremenningarnir byggðu á því að ákvæði samningsins fæli í sér að TM greiði allan kostnað sem þeir hafi þegar orðið fyrir og muni verða fyrir vegna tiltekinna málshöfðana á hendur þeim hér á landi og í Bandaríkjunum.

Héraðsdómur hafði fallist á kröfur þremenninganna og viðurkennt að ákveðinn skilmáli í samningi milli TM og Glitnis um 72 mánaða tilkynningarfrest stæði því ekki í vegi að kröfur þeirra gegn TM næðu fram að ganga og stjórnendatryggingin væri því virk.

Á þetta féllst Hæstiréttur hins vegar ekki og vísaði til þess að Glitnir hefði á árinu 2009 keypt aðra stjórnendatryggingu hjá öðru vátryggingafélagi í stað hinnar upphaflegu hjá TM frá árinu 2008. Væri því samkvæmt skýru og afdráttarlausu orðalagi samningsákvæðisins ekki fullnægt því skilyrði að ekki hefði í stað upphaflegu tryggingarinnar verið keypt önnur trygging sem veitti stjórnendum og yfirmönnum ábyrgðartryggingu og var TM því sýknað.

Málið í gær var ekki eina mál Lárusar Welding í Hæstarétti en hann var í gær sýknaður af ákæru sérstaks saksóknara um umboðssvik eins og Vísir greindi frá í gær.