Einvígi í Söngvakeppninni annað kvöld

Nýtt fyrirkomulag verður haft á í Söngvakeppninni 2014, þar sem keppt er um hvaða lag það verður sem Ísland sendir í Eurovision Song Contest þetta árið.

„Þegar öll sex lögin hafa keppt þá er símakosning og dómnefnd sem skilar inn sinni niðurstöðu. Sem gildir helming og helming. Tvö efstu lögin, þegar búið er að reikna þetta tvennt saman, fara þá í einvígi. Tilkynnt verður hvaða tvö lög verða efst. Sú nýung sem verður núna er sú að ef flytjendur og/eða höfundar hafa ætlað sér að flytja lagið á ensku eða öðru tungumáli en íslensku, þá skulu þeir flytja lagið við þann texta í einvíginu. Þetta er gert til að gefa áhorfendum kost á að velja út frá því hvernig lagið mun ljóma úti,“ segir Hera Ólafsdóttir framkvæmdastjóri söngvakeppninnar 2014.

Keppnin hefst í Háskólabíói klukkan 19:45. Þá hefst bein útsending í Ríkissjónvarpinu. Löngu uppselt að sögn Heru, miðar í úrslitin seldust upp á hálftíma. „Svo var einnig selt á lokaæfinguna, sem var hálf fjögur og það seldist upp á hana líka,“ segir Hera.