Farþegar ekki sáttir

Rúmlega sólarhringsseinkun hefur orðið á flugi Icelandair frá Kaupmannahöfn til Íslands. Flugvél sem átti að fara í gærkvöldi bilaði og þegar viðgerð átti að vera lokið og vélin að fara af stað til Íslands í kvöld kom í ljós að hún var enn biluð.

„Þá var ekki annað að gera en að senda farþegana á hótel,“ segir Guðjón Arngrímsson, upplýsingafulltrúi Icelandair.

Hvort að upplýsingagjöf til farþega vélarinnar hafi verið sinnt vel segist Guðjón halda og vona það.

Farþegarnir sem áttu að koma til landsins í gær verða nú aðra nótt á hóteli í Kaupmannahöfn.

Rún Knútsdóttir er ein þeirra sem átti flug með vélinni. Hún segir að upplýsingagjöf til farþeganna hefði mátt vera betri en þau hafi fengið góða þjónustu að öðru leyti, mat og þess háttar.

Mörgum hafi þótt óþægilegt að fara út í vélina sem var biluð eftir að viðgerð lauk og hún segir farþegana ekki skilja af hverju það var ekki send ný vél strax. Hún segir marga ekki sátta.

Farþegarnir hafa nú fengið þær upplýsingar að ný vél sem send verði á staðinn fari í loftið frá Kaupmannahöfn um hádegi á morgun. „Það verður gott að komast heim, þetta átti bara að vera stutt ferð og ég var alls ekki tilbúin í þriggja daga ferð,“ segir Rún.