35 fíkniefnabrot í tengslum við Sónar

35 fíkniefnabrot  hafa komið upp í tengslum við Sónar Reykjavík- tónlistarhátíðina sem hófst á fimmtudaginn. Lokakvöld hátíðarinnar er í kvöld en þetta er í annað sinn sem hún er haldin hér á landi. 

67 listamenn og hljómsveitir koma fram á Sónar Samkvæmt upplýsingum frá skipuleggjendum eru tónleikagestir um 3500, þar af rúmlega 100 erlendir blaðamenn.

Í tilkynningu frá lögreglu kemur fram að tuttugu fíkniefnamál hafi komið upp í nótt. Brotin voru  í og við Hörpu og er því hægt að tengja þau við hátíðina. Á fimmtudag komu upp 15 fíkniefnamál á Sónar og málin því orðin 35 þegar eitt kvöld er eftir. Steinþór Helgi Arnsteinsson, upplýsingafulltrúi Sónar, segir skipuleggjendur hátíðarinnar vera í nánu samstarfi við fíkniefnadeild lögreglunnar.

Steinþór segir að hátíðin hafi gengið vel og farið vel fram. Hápunktinum verður svo náð í kvöld, en meðal þeirra sem fram koma er danski tónlistarmaðurinn Trentemöller, Major Lazer og íslenskar sveitir á borð við FM Belfast, Hjaltalín, Sísí Ey og Sykur.