Segir slæmt ef fjölga eigi seðlabankastjórum

Lögum um Seðlabanka Íslands verður breytt og stendur sú vinna yfir í fjármálaráðuneytinu. Þetta segir Sigmundur Davíð Gunnlaugsson forsætisráðherra. Hann útilokar ekki að seðlabankastjórum verði fjölgað

Sigmundur Davíð Gunnlaugsson forsætisráðherra upplýsti um þetta í viðtali við Gísla Martein Baldursson í Sunnudagsmorgni á Rúv.

„Það hefur legið fyrir nokkuð lengi að það þyrfti að breyta lögunum um Seðlabankann. Þetta birtist í þingmálaskrá ríkisstjórnarinnar. Nýjasta uppfærslan af henni er frá miðjum janúar.“

„Hvað varðar fjölda seðlabankastjóra þá geri ég ráð fyrir því að það sé eitt af því sem verið er að skoða. Það eru ákveðin rök sem hníga að því að það sé æskilegt að hafa fleiri en einn. Önnur rök hníga að því að það sé gott að hafa einn. Þetta eru menn að vega og meta.“

Undir lok viðtalsins lýsti forsætisráðherra áliti sínu á frammistöðu Gísla Marteins í þættinum.

Árni Páll Árnason formaður Samfylkingarinnar, stærsta stjórnarandstöðuflokksins, segir það stíl forsætisráðherra að gefa ýmislegt til kynna og bera ekkert til baka.

Árni Páll segir slæmt ef fjölga eigi seðlabankastjórum til að koma pólitískum bandamönnum að.

Það verður á endanum ákvörðun fagráðherra málaflokksins að leggja frumvarpið fram, þ.e fjármála- og efnahagsráðherra.

Í þingmálaskrá ríkisstjórnarinnar á vef stjórnarráðsins er ekki getið frumvarpsins um Seðlabankann þrátt fyrir ummæli forsætisráðherra en það er hins vegar í uppfærðri þingmálaskrá sem ekki hefur verið birt.

Hægt er að horfa á viðtalið við Árna Pál í heild sinni hér að ofan.