Metkjörsókn í kosningunum til stúdentaráðs

Kjörsóknin í nýafstöðnum kosningum til Stúdentaráðs Háskóla Íslands var tæp 41 prósent, sem er nýtt met í sögu stúdentapólitíkurinnar.

María Rut Kristinsdóttir, formaður stúdentaráðs og oddviti Vöku, telur að áhugann megi að stóru leyti rekja til þess hve sýnilegt og opinberlega virkt stúdentaráðið var í vetur, ekki síst með einarðri baráttu við lánasjóð stúdenta en þetta kemur fram í frétt á vefnum student.is.

Hún segir mikilvægt að kosningaþátttakan sé góð, því það gefi fulltrúum skýrara umboð til að berjast fyrir sameiginlegum hagsmunum stúdenta.

Ný stjórn tekur við í júníbyrjun, með Vöku í afgerandi meirihluta. Svæðaráðin hefja þó störf sem fyrst og vinna vinna nýkjörnir fulltrúar þeirra með núverandi ráðum fram að stjórnarskiptum, enda er mikilli reynslu frá vetrinum að miðla.