Mættu í bolum til stuðnings framhaldsskólakennurum

Nemendur við Menntaskólann á Laugavatni mættu í morgun í tíma íklæddir svörtum bolum til stuðnings kennara skólans en þetta kemur fram í frétt á vef skólans.

Á bolunum stóð: „Vér mótmælum allir“ að framan og að aftan stóð „Leiðréttum laun kennara. Bætum menntakerfið. Við erum framtíðin.“

Það er Nemendafélagið Mímir sem stendur að þessari blöndu af áhyggjum af því sem gerast kann í kjarabaráttu kennara á næstu vikum og mánuðum og kröfunni um að laun kennara fái að endurspegla mikilvægi starfs þeirra.

Fram kemur í fréttinni að það mátti sjá tár á hvarmi sumra kennara þegar þeir litu augum þennan táknræna gjörning nemenda sinna.

Framhaldsskólakennarar vilja leiðrétta laun sín sem að þeirra sögn er komin úr öllu samhengi við raunveruleikann.