Kannast ekki við pólitískar hnífstungur

Forseti bæjarstjórnar í Kópavogi kannast ekki við að Sjálfstæðisflokkurinn í Kópavogi sé klofinn. Hún undrast ummæli Margrétar Friðriksdóttir sem sækist eftir að leiða lista flokksins í komandi prófkjöri.

Aðalsteinn Jónsson bæjarfulltrúi Sjálfstæðisflokksins sagði í hádegisfréttum Bylgjunnar á laugardag að menn kæmu með hnífa í bakinu eftir störf í flokknum. Margrét Friðriksdóttir skólameistari MK, sem sækist eftir efsta sæti á lista sjálfstæðismanna, sagði á laugardag að flokkurinn væri klofinn.

Margrét Björnsdóttir, forseti bæjarstjórnar, undrast ummæli kollega sinna í flokknum. „Að það sé hyldýpi, hnífakast og agaleysi er eitthvað sem ég kannast alls ekki við,“ segir Margrét.

Er Margrét Friðriksdóttir þá að segja ósátt?

„Hún hefur einhvers staðar heimildir um þetta. Ég hef ekki þær heimildir. Ég er starfandi forseti bæjarstjórnar í Kópavogi og kannast ekki við þetta. Margrét verður að svara fyrir það hvar hún hefur þessar upplýsingar,“ segir Margrét Björnsdóttir.

Samkvæmt heimildum fréttastofu þá er mikill ágreiningur milli stuðningsmanna Ármanns Kr. Ólafssonar annars vegar og Gunnar Inga Birgissonar hins vegar. Stuðningsmenn Ármanns segja Gunnar reyna að kljúfa flokkinn og koma Ármanni frá völdum. Gunnar studdi nýverið tillögu minnihlutans á kaupum á 30-40 leiguíbúðum vegna neyðarástands á leigumarkaði sem olli upplausn innan meirihlutans. Prófkjör Sjálfstæðismanna fer fram á laugardag.