Kærastinn hljóp inn í alelda íbúð til að bjarga tengdamömmu

Fjölskylda slapp naumlega þegar að eldur kviknaði í fjölbýlishúsi í Árbæ í nótt. Maður um tvítugt vann ótrúlegt björgunarafrek þegar hann óð aftur inn í alelda íbúð til að bjarga tengdamóður sinni og heimilisdýrum. Íbúðin er gjörónýt.

Sex voru fluttir á slysadeild vegna gruns um reykeitrun eftir að eldur kom upp í íbúð á annarri hæð í fjölbýlishúsi í Hraunbæ 30 í nótt. Enginn slasaðist alvarlega og voru allir útskrifaðir eftir læknisskoðun.

Slökkvilið var fljótt á staðinn og skipti það sköpum. Vel gekk að ráða niðurlögum eldsins. „Það var mjög mikil hætta á ferðum og alveg ótrúlegt að allt fólkið skyldi komast út miðað við hversu illa íbúðin er farin,“ sagði Magnús Kristófersson, varðstjóri hjá Slökkviliðinu á höfuðborgarsvæðinu.

Bjargaði tengdamóður og hundi

Grunur leikur á að eldur hafi kviknað út frá kerti sem logaði við inngang íbúðarinnar. Eldurinn breiddist hratt út og náðu íbúarnir að komast út við krappan leik. Sædís Alma Snæbjörnsdóttir býr í íbúðinni sem varð eldi að bráð í nótt. Hún ásamt kærasta sínum og litlu frænku sinni komust út úr íbúðinni en móðir hennar varð eftir. Unnustinn sýndi mikla hetjudáð og óð aftur inn í alelda íbúðina til að bjarga tengdamóður sinni og heimilisdýrum. Honum tókst að bjarga hundi fjölskyldunnar en sömu sögu er því miður ekki hægt að segja af heimiliskettinum.

„Kærastinn minn hljóp aftur inn í gegnum alelda hurðina og nær í mömmum mína og hundinn,“ sagði Sædís Alda. Hún var miður sín þegar fréttastofa náði tali af henni í dag. Hún segir íbúðina gjörónýta eftir brunann.

Allt horfið

„Það er all horfið inni í íbúðinni. Ég á að eiga eftir minna en mánuð og var búin að kaupa allt fyrir barnið. Það er allt ónýtt,“ segir Sædís. „Það er ekki gaman að vakna og sjá íbúðina alelda. Hitinn þarna inni, ég sá ekki neitt.“

Sædís varar fólk við því að hafa kerti logandi án eftirlits. „Ég vil hvetja alla til þess að hafa ekki kveikt á kertum, lítið kerti getur kveikt í heilli íbúð.“