Bjargaði lífi vinkonu sinnar. "Þau voru mjög heppin"

Eldur kom upp í íbúð við Mávabraut í Reykjanesbæ um klukkan níu í gær. Pari á miðjum aldri var bjargað út og varð ekki alvarlega meint af. Þau voru fyrst flutt á Heilbrigðisstofnun Suðurnesja en síðan Landspítala háskólasjúkrahús og þaðan höfðu þau verið útskrifuð í morgun.

Eldurinn kom upp í gærkvöldi en þegar fréttamaður Stöðvar 2 fór á staðinn í dag var brunalyktin ennþá mjög sterk. Glerbrot voru um allt, eftir rúðuna sem var brotin til að bjarga fólkinu út og ef stofugluggar voru skoðaðir sást hvernig þeir voru sprungnir að innan sem gefur hugmynd um þann gríðarlega hita sem myndaðist í íbúðinni. Þetta má sjá í meðfylgjandi myndskeiði.

Þegar eldurinn kom upp var fólkið lagst til svefns og sem betur fer hafði það lokað hurð svefnherbergisins, því eldurinn blossaði upp í stofunni.

Bryndís Sigurðardóttir, nágranni og æskuvinkona konunnar sem bjargað var, varð vör við brunalykt. „Ég rýk út á veröndina hjá okkur, sé rosalegt reykjarkóf og heyri þau banka og berja og hrópa á hjálp. Ég rýk inn, fer í símann til að hringja eftir aðstoð og maðurinn minn stekkur yfir til þeirra. Hann prófar fyrst að henda stól í gluggann en það gekk ekki og þá greip hann strákúst og náði að brjóta rúðuna og hjálpa Ósk út. Svo komu slökkvilið og lögreglumaður að og hjálpuðu Geira út,“ segir Bryndís.

„Þegar ég kem á staðinn berst mikill reykur út úr andyrinu og greinilegt að það var mikill hiti þarna. Reykurinn sem barst út var svartur,“ segir Sigurður Skarphéðinsson, varaslökkviliðsstjóri Brunavarna Suðurnesja.

Sigurður kallaði inn í húsið. Engin svör bárust en tvennt var sagt í húsinu og fóru reykkafarar inn. Þegar fólkinu hafði verið bjargað var það svart í framan og Sigurður segir greinilegt að það hafi andað að sér reyk. Hann og Bryndís eru sammála um að mjög tæpt hafi staðið enda komst fólkið ekki út af sjálfsdáðum.

Hvernig líður þér sjálfri eftir þetta?

„Ég get ekki hugsað mér, hvernig þetta hefði getað endað. Ég hef ekki leyft mér að hugsa það,“ segir Bryndís og beygir af.

„Vegsummerkin á íbúðinni eftir að eldurinn hafði verið slökktur segja okkur að það er alveg greinilegt að þau voru mjög heppin. Íbúðin er mjög illa farin,“ segir Sigurður. Hann minnir á mikilvægi reykskynjara sem reglulega bjargi mannslífum.

Ósk Sigmundsdóttir, sem bjargað var úr íbúðinni, treysti sér ekki í viðtal við Stöð 2 í dag. 15 ára köttur hennar dó í eldsvoðanum og hún kveðst þreytt og illa á sig komin. Fyrst og fremst er hún þó þakklát fyrir að vera á lífi.