Fylgi ríkisstjórnarinnar minnkar áfram

Stuðningur við Sjálfstæðisflokkinn á landsvísu hefur minnkað um rúm tvö prósentustig samkvæmt nýrri könnun MMR. Stuðningur við ríkisstjórnina mælist nú 34,5 prósent en mældist 35,38 prósent í síðustu mælingu.

Nýja könnunin var framkvæmd dagana 6. til 11. maí.

Björt framtíð bætir við sig tæpum þremur prósentustigum á milli kannana. Flokkurinn fengi 19,4 prósent ef gengið yrði til kosninga nú.

Sjálfstæðisflokkurinn fengi 22,1 prósent. Samfylkingin mælist með 16,4 prósent, Framsóknarflokkurinn með 12,3 prósent, Vinstri grænir með 11,6 prósent og Píratar 9,6 prósent. Aðrir flokkar fengu minna.

Lagðar voru þrjár spurningar fyrir svarendur um stuðning þeirra við stjórnmálaflokka. Allir voru spurðir: „„Ef kosið yrði til Alþingis í dag, hvaða flokk myndir þú kjósa?“ Ef svarið var veit ekki eða óákveðinn var sá næst spurður: „En hvaða flokkur yrði líklegast fyrir valinu?“ Ef svarið var aftur veit ekki eða óákveðinn var sá loks spurður: „Hvort er líklegra að þú kysir Sjálfstæðisflokkinn eða einhvern hinna flokkanna?“

Fjöldi þeirra sem svaraði „einhvern hinna“ í þriðju spurningunni var skipt milli annarra flokka en Sjálfstæðisflokksins í sama hlutfalli og fylgi þeirra var samkvæmt fyrstu og annarri spurningu.

Samtals voru 81,5 prósent sem gáfu upp afstöðu til flokka, 4,6 prósent kváðust óákveðnir, 6,4 prósent myndu skila auðu, 1,8 prósent myndu ekki kjósa og 5,7 prósent vildu ekki gefa upp afstöðu sína.

Myndin sýnir niðurstöðu könnunar að viðbættum efri og neðri vikmörkum miðað við 95% öryggisbil.