Framtíð margra einstaklinga ræðst um helgina

„Þetta er tíunda árið sem Háskóladagurinn er haldinn og aðsóknin hefur alltaf verið mjög góð,“ segir Hildur Katrín Rafnsdóttir, náms- og starfsráðgjafi í Háskóla Íslands, en kynningar á námsframboði háskólastofnana á Íslandi fara fram á laugardaginn og hefst dagskráin klukkan 12. Í Háskóla Íslands eru nú um 14.000 nemendur og hefur námsmönnum fjölgað talsvert á undanförnum árum.

Hildur Katrín segir þann hóp fólks sem sækir Háskóladaginn vera annars vegar þá sem koma til að fá staðfestingu á því sem þeir halda og hafa kynnt sér og hins vegar hópinn sem þarf aðeins meiri aðstoð til að finna áhugasvið sitt og kynna sér námsleiðirnar nánar.



„Við bjóðum upp íslenska áhugakönnun sem heitir Bendill III sem felur það í sér að hún tekur mið af íslensku námsumhverfi og íslenskum vinnumarkaði ólíkt þeim áhugakönnunum sem hafa staðið Íslendingum til boða hingað til. Þetta er rafræn könnun og getur hver sem hefur áhuga á að fara í háskóla skráð sig í hana á Þjónustuborðinu á Háskólatorgi,“ útskýrir Hildur Katrín. Fólk getur tekið könnunina í tölvuveri og tekur hún um tvo tíma. „Þetta er rafræn áhugakönnun sem einblínir á háskólanám og búið er að kortleggja háskólanám fyrir hana.“

Háskólinn á Akureyri, Háskólinn á Hólum og Landbúnaðarháskóli Íslands, ásamt Keili verða með námskynningu á Háskólatorgi í Háskóla Íslands. Háskóli Íslands kynnir námsframboð sitt í Aðalbyggingu, Háskólatorgi, Öskju og Háskólabíói. Háskólinn í Reykjavík og Háskólinn á Bifröst kynna námsframboð háskólanna í Háskólanum í Reykjavík í Nauthólsvík. Listaháskóli Íslands verður með kynningu á námsbrautum sínum í Þverholti 11.

Hvað gerir félagstýpan?

Félagsvísindasviðið er langstærsta sviðið í Háskólanum en um 4.600 manns eru á félagsvísindasviði.

Þar er að finna ótal námsleiðir eins og til dæmis viðskiptafræði, lögfræði, stjórnmálafræði, hagfræði og margt fleira. Félagsvísinda- og hugvísindasvið eru mjög sveigjanleg.

Manneskja sem hefur brennandi áhuga á alþjóðasamskiptum gæti til dæmis tekið tungumál með og öfugt. Viðskiptafræðin og lögfræðin eru vinsælustu námsgreinarnar.

Dæmi um störf eftir nám af félagsvísindasviði:

Lögfræðingur, stjórnmálafræðingur, viðskiptafræðingur, félagsfræðingur og félagsráðgjafi ásamt fjölda annarra starfa.

Hvað gerir íþróttatýpan?

Þá hentar menntavísindasvið þar sem íþróttafræðin er kennd og hins vegar heilbrigðisvísindasvið þar sem sjúkraþjálfun og næringarfræði er að finna.

Þeir sem vilja læra íþróttafræði þurfa að fara á Laugarvatn og útskrifast þá sem íþróttafræðingar.

Sjúkraþjálfunin og næringarfræðin eru kennd í höfuðborginni. Sama inntökupróf er í sjúkraþjálfun og í læknisfræði.

Yfirleitt hafa 25 komist að í sjúkraþjálfunarnám en í dag komast 35 inn.

Dæmi um störf eftir nám af menntavísindasviði og íþróttafræði:

Íþróttafræðingur, sjúkraþjálfari, næringarfræðingur og margt fleira

Hvað gerir vísindatýpan?

Líklegast er að verkfræði- og náttúruvísindasvið henti þeim einstaklingum vel. Það er þó ekki eingöngu verkfræðin sem er að finna á þessu sviði því þar er til dæmis að finna jarðfræði, líffræði, stærðfræði, eðlisfræði og efnafræði, ásamt mörgum fleiri greinum.

Innan stærðfræðinnar þarf einstaklingurinn ekki bara að taka stærðfræðigreinar því hægt er að blanda námsleiðum saman í náminu.

Ef einstaklingur hefur áhuga á stærðfræði og mannlegum samskiptum gæti til dæmis stærðfræðikennsla átt vel við. Þá eru í boði kjörsvið sem opna marga möguleika.

Dæmi um störf eftir nám af verkfræði- og náttúruvísindasviðið:

Stærðfræðingur, jarðfræðingur, efnafræðingur, eðlisfræðingur, byggingaverkfræðingur, líffræðingur og margt fleira.

Hvað gerir heilbrigða týpan?

Ef fólk hefur áhuga á læknisfræði er margt í boði. Það er árlegt inntökupróf þar sem allir eru jafnir við borðið. 70% af spurningum inntökuprófsins er efni framhaldsskólanna og 30% almenn þekking.

Það eru 48 sem komast inn á ári hverju. Eftir grunnnám í læknisfræði tekur við framhaldsnám eða sérnám.

Algengt er að nemendur, sem lokið hafa grunnnámi eftir kandídatsprófið, byrji að vinna heima til að öðlast reynslu áður en haldið er út í sérnám. Þá er hjúkrunarfræðin einnig vinsæl. Það geta allir hafið nám í hjúkrunarfræði en einungis 95 einstaklingar geta haldið áfram á vormisserinu.

Eftir grunnnám fara kandídatar annaðhvort í skurðlækningar eða lyflækningar erlendis.

Einnig er vert að geta þess að það verður Instagram leikur í gangi þar sem verðandi háskólanemar geta tekið mynd sem fangar draumastarfið og merkja hana #hdagurinn og senda á haskoladagurinn@haskoladagurinn.is fyrir 31. mars 2014. Vegleg verðlaun eru í boði líkt og Spjaldtölva og armband.