Kvöldmáltíð varaborgarfulltrúa kostaði minna en 248 krónur

„Þetta smellpassaði í þetta sinn. En ég fékk mér líka bara eina bollu,“ segir Líf Magneudóttir, varaborgarfulltrúi Vinstri grænna, sem deildi því með Facebook-vinum sínum í kvöld að henni hefði tekist að borða kvöldverð sem kostaði minna en 248 krónur á mann.

„Ég fékk mér kjötfarsbollur og kartöflumús og við erum sex á heimilinu,“ segir Líf. „Maðurinn minn hélt að ég væri ekki í mat og þess vegna keypti hann þetta. Ég semsagt borða ekki kjötfars. Svo var ég bara í mat. En þetta er náttúrulega einn ódýrasti maturinn sem þú getur keypt.“

Upphæðin 248 krónur vísar að sjálfsögðu til umræðunnar um frumvarp fjármálaráðherra um breytingar á virðisaukaskatti, þar sem tekið var dæmi um fjölskyldu sem eyðir 248 krónum á mann í hverja máltíð. Líf bendir á að þar sem sex manns eru í fjölskyldu hennar, njóti þau ákveðinnar stærðarhagkvæmni.

„Þannig að kvöldmáltíðin er oft í kringum þetta,“ segir hún. „Það nefnilega skiptir máli hvort maður er einn eða sex.“

Þótt að máltíðin hafi ekki verið dýr, á Líf hinsvegar ekki von á því að borða aðra slíka í bráð.

„Ég held að ég borði kjötfars einu sinni á ári og þetta hafi verið það skiptið,“ segir hún.