Mama June svarar fyrir sig

Raunveruleikastjarnan Mama June, sem heitir réttu nafni Shannon, veitti viðtal við sjónvarpsstöðina E! í gær.

Shannon hefur verið mikið í umræðunni eftir að upp komst að hún ætti í ástarsambandi við dæmda barnaníðinginn Mark McDaniel. Í kjölfarið var raunveruleikaþátturinn Here Comes Honey Boo Boo tekinn af dagskrá á sjónvarpsstöðinni TLC en Shannon og fjölskylda hennar eru stjörnur þáttarins.

Shannon á dæturnar Alana „Honey Boo Boo“ Thompsons, Önnu Cardwell, Lauryn „Pumpkin“ Shannon og Jessicu „Chubbs“ Shannon. Hún er ekki sár yfir því að þátturinn var tekinn af dagskrá.

„Ég get ekki sagt neitt slæmt um þáttinn. Ég get ekki sagt neitt slæmt um TLC.“

Þá spurði blaðamaður hvort hún væri í sambandi við elstu dóttur sína Önnu Cardwell en Anna heldur því fram að kærasti móður sinnar hafi misnotað sig þegar hún var átta ára.

„Ég tala við hana - ég tala við öll börnin mín. Við höfum það öll gott. Við eyðum tíma saman sem fjölskylda og tökum á þessu máli í friði. Það sem er í forgangi hjá mér er að vernda börnin mín.“