Eiður vinsæll á Facebook

Meira en tuttugu og fjórum þúsundum líkar við Facebook-síðu sem var stofnuð til heiðurs Eiði Smára Guðjohnsen eftir landsleik Króatíu og Íslands í fyrrakvöld.

Aðeins um tveimur klukkustundum eftir að síðan Takk fyrir okkur Eiður Smári var stofnuð hafði tæplega tíu þúsundum líkað hún. Hjálpaði þar vafalítið til hjartnæmt viðtal fréttamanns Sjónvarpsins við Eið Smára eftir leikinn, þar sem hann tilkynnti með tárin í augunum að hann væri sennilega hættur að spila með landsliðinu eftir farsælan feril.

Miðað við hversu „lækin“ bætast hratt við má telja líklegt að aðdáendum hennar eigi eftir að fjölga um mörg þúsund á næstunni.

Stofnendur síðunnar hafa einnig hvatt til þess að Eiður Smári fái að spila kveðjulandsleik og hver veit nema KSÍ verði við þeirri beiðni.