Góð veiði en rysjótt tíðarfar

 Togarar Síldarvinnslunnar, Barði NK og Bjartur NK, hafa verið að veiðum í rysjóttu tíðarfari að undanförnu en afli hefur verið góður þegar færi hefur gefist til veiða.

Frystitogarinn Barði kom til heimahafnar í Neskaupstað í fyrradag og var með blandaðan afla, alls 334 tonn upp úr sjó. Stærstur hluti aflans var ufsi og þorskur en einnig var töluvert af gullkarfa og grálúðu.

Ísfisktogarinn Bjartur kom til Neskaupstaðar á mánudagskvöld með um nítíu tonn en aflinn var mest þorskur. Veðurfar var aftur á móti leiðinlegt.