Fyrrum fjármálastjóri Háskóla Íslands ákærður fyrir fjárdrátt

Nú hefur ríkissaksóknari gefið út ákæru á hendur fyrrverandi fjármálastjóra Háskóla Íslands en maðurinn er grunaður um að draga að sér rúmlega níu milljónir króna á árunum 2007-2012.

Hann er ákærður fyrir fjárdrátt sem og fjársvik í opinberu starfi.

Fram kemur í ákærunni að starfsmaðurinn hafi greitt með kreditkorti Háskóla Íslands í 59 skipti og því misnotað aðstöðu sína en hann mun hafa eytt tæplega einni og hálfri milljón með kortinu.

Fram kemur í ákærunni að aðilinn hafi í nokkur skipti notað kreditkortið í áfengisverslun ríkisins en einnig voru fjölmörg dæmi um að hann hafi notað kortið á veitingarhúsum borgarinnar.

Hæsta einstaka færsla mannsins var á hóteli í Las Vegas en ku hún hafa verið upp á 250 þúsund krónur.

Einnig er hann ákærður fyrir fjárdrátt og ku hafa blekkt gjaldkera Háskóla Íslands.