Álverið framleiðir nú fimmfalt meira

Framkvæmdir við breytingar á álveri Norðuráls á Grundartanga hafa aukið framleiðslugetu þess um átta þúsund tonn á ári.

Álverið getur nú framleitt 295 þúsund tonn af áli á ári, eða fimmfalt meira en árið 1998 þegar það hóf framleiðslu.

„Framleiðsluaukningin á þessu ári kemur eingöngu í gegnum það að við náðum að hækka straum á kerum álversins með því að stækka aðveitustöðvar og bæta við nýjum rafbúnaði,“ segir Ágúst F. Hafberg, framkvæmdastjóri viðskiptaþróunar Norðuráls.

Í desember í fyrra fór fyrirtækið í kostnaðarsamt fjárfestingarverkefni og er nú stærsta verkþættinum sem Ágúst lýsir lokið. Verkefnið hefur til þessa kostað um þrjá milljarða króna. Ágúst segir að heildarkostnaður þess verði tíu til tólf milljarðar. Bæta á rekstraröryggi álversins og auka framleiðslu um allt að fimmtíu þúsund tonn á ári með straumhækkun. Móðurfélag Norðuráls, Century Aluminum, keypti að auki rafskautaverksmiðju í Hollandi fyrir átta milljarða króna sem mun framleiða ný og stærri rafskaut fyrir álverið.

„Nú þegar við erum búin að reisa þessar sextán hundruð fermetra byggingar og tengja allan rafbúnað eru næstu skref fólgin í breytingum á skautsmiðju álversins. Það er stórt verkefni og svo eru ýmis smærri verkefni sem við erum að vinna í.“

Ágúst segir erfitt að spá um verklok. Þau ráðist af því hversu vel gengur að auka rafstrauminn inn í álverið. „Planið er að við verðum í því að auka strauminn næstu tvö til þrjú árin,“ segir Ágúst.

Rekstur Norðuráls skilaði um sex milljarða króna hagnaði á síðasta ári. Álverð hefur lækkað talsvert frá árinu 2011. Ágúst segir að rekstur álversins á Grundartanga hafi gengið ágætlega það sem af er ári.

„Við höfum hagrætt og þessi framleiðsluaukning bætir reksturinn. Við erum að fara inn í þessa fjárfestingu af því að það er mikil eftirspurn eftir áli á okkar mörkuðum þó að verðið sé tiltölulega lágt í augnablikinu. Álverð sveiflast alltaf en við horfum á vöxtinn sem er framundan,“ segir hann.