Stúlkan dró móður sína úr logandi íbúðinni

„Ég vaknaði við mikil læti og hróp á hjálp,“ segir Ólafur Snævar Ögmundsson íbúi við Írabakka 30. „Þegar ég kom fram á gang sá ég nágrannakonu mína í dyragættinni mikið meidda. Úr íbúðinni kom mikill eldur sem fyllti ganginn af reyk. Konan var hrópandi á 14 ára gamla dóttur sína sem var enn föst inni í íbúðinni.“

Eins og fram kom á Vísi kom upp eldsvoði í fjölbýlishúsi í Írabakka 30 í Breiðholti í morgun. Fjórir voru fluttir á slysadeild, tveir á gjörgæslu en annar er talin í lífshættu vegna brunasára. Mikill eldur var í íbúðinni sem hafði sprengt sér út um glugga. Ólafur Snævar býr í íbúðinni við hliðina á þeirri sem kviknaði í.

Ólafur reyndi að komast inn í íbúðina en gekk ekki sem skildi sökum elds og reyks. Hann fór því aftur inn í íbúðina sína og út á svalir þar sem hann klifraði yfir á svalir nágrannakonunar. Þannig komst hann inn í íbúðina gegnum rifu sem skilin var eftir opin fyrir kött konunnar.

„Ég fór inn í íbúðina og leitaði að stúlkunni en komst ekki langt þar sem íbúðin stóð í ljósum logum. Reykurinn kom í veg fyrir að fært væri um íbúðina,“ segir Ólafur.

Þegar Ólafur kom til baka sá hann að mæðgurnar voru báðar komnar. Hann segist ekki enn skijla hvernig það gerðist en að fjórtán ára gömul stúlkan hafi náð að draga særða móður sína út úr íbúðinni.

„Ég er nú maður á miðjum aldri með grátt í hári og skeggi en þegar ég kom út var það allt svart,“ segir Ólafur.

Það var lán í óláni að annar bruni hafði orðið í Breiðholti þessa sömu nótt og var allt tiltækt slökkvilið á höfuðborgasvæðinu því mætt á vettvang aðeins nokkrum mínútúm eftir að tilkynnt var um brunann. Ólafur hjálpaði slökkviliðinu að setja upp brunastiga áður en hann fór sjálfur út.

Ólafur slapp furðu vel en hann segist hafa hulið andlit sitt með handklæði. Eigandi íbúðarinnar og dóttir hennar voru fluttar á slysadeild ásamt eiginkonu Ólafs sem glímir við krabbamein. „Hún var nýkomin heim af spítalanum og því rosalega viðkvæm fyrir“, segir Ólafur.