Þorvaldur álitlegur kostur fyrir ÍA

Þórður Guðjónsson segir að félaginu hafi borist fjölda umsókna um þjálfarastarfið eftir að Þórður Þórðarson hætti í gær.

„Það eru um tíu umsóknir komnar erlendis frá inn á okkar borð,“ sagði Þórður, sem er framkvæmdarstjóri ÍA, í samtali við Reitarboltann á 433.is í dag.

Þorvaldur Örlygsson, sem hætti hjá Fram fyrir stuttu síðan, hefur verið orðaður við starfið hjá ÍA. Þórður vildi þó ekki staðfest að félagið hafi fundað með Þorvaldi í gær.

„En ég get staðfest að ÍA telur að Þorvaldur sé álitlegur kostur fyrir félagið. En það er of viðkvæmt að ræða um stöðu einstakra þjálfara á þessum tímapunkti.“

Hann segir ljóst að nýr þjálfari mun fá pening til leikmannakaupa í sumar. „Hann mun fá tækifæri til að styrkja leikmannahópinn í glugganum í júlí, alveg eins og Þórður Þórðarson hefði fengið.“

„ÍA er öflugt félag með mikla sál og sögu og hér eru allar aðstæður til fyrirmyndar og rekstrarumhverfið gott. Starfsöryggi og launaöryggi eru til staðar hjá okkur,“ sagði Þórður.