Formaður ÍA: Þorvaldur hefur upp á margt að bjóða

Ingi Fannar Eiríksson, formaður knattspyrnudeildar ÍA, er hæstánægður með að ÍA hafi náð að landa samningi við Þorvald Örlygsson.

"Þessar viðræður gengu hratt fyrir sig. Eftir að hafa talað við Þorvald vorum við sannfærðir um að hann væri rétti maðurinn fyrir okkur," sagði Ingi Fannar og bætti við að Þorvaldur hefði verið eini þjálfarinn sem Skagamenn hefðu rætt við.

"Við ræddum ekki við Pétur Pétursson. Hann gaf það út í fjölmiðlum að hann hefði ekki áhuga á starfinu og þar með náði það ekki lengra."

Þorvaldur er ekki með hefðbundinn þjálfarasamning eins og tíðkast í boltanum.

"Hann er bara ráðinn í vinnu eins og annað fólk. Það er svo þriggja mánaða uppsagnarfrestur sem virkar á báða bóga."

Þorvaldur er tiltölulega nýhættur með lið Fram og stýrir nú sínu öðru liði í Pepsi-deildinni í sumar.

"Þorvaldur hefur upp á margt að bjóða sem þjálfari. Hann er með mikla reynslu í efstu deild og náði flottum árangri með Fram og við stefnum upp á við með hann við stjörnvölinn."