11 kærðir fyrir of hraðan akstur

11 ökumenn voru kærðir fyrir of hraðan akstur í síðustu viku í umdæmi lögreglunnar á Vestfjörðum. Sex ökumenn voru kærðir í nágrenni Hólmavíkur á Djúpvegi og fimm í og við Ísafjörð. Eitt minniháttar óhapp var tilkynnt til lögreglu, litlar skemmdir og ekki slys á fólki.

Þá voru skráningarmerki tekin af nokkrum ökutækjum á Ísafirði og Patreksfirði vegna vanrækslu á aðalskoðun og einnig vegna þess að tryggingar voru fallnar úr gildi. Einn ökumaður var kærður vegna gruns um meinta ölvun við akstur.

Í tilkynningu segist lögreglan vilja beina því til ökumanna að núna séu margir ungir vegfarendur á ferð fyrr á morgnana en áður og brýnir fyrir ökumönnum að taka tillit til þeirra og aka ávallt sérstaklega varlega í nágrenni við leik og grunnskóla. Þá hvetur lögreglan eldra reiðhjólafólk að vera fyrirmynd þeirra yngri og nota hjálma og áberandi vesti til að ökumenn eigi auðveldara með að sjá þá sem eru á ferðinni á reiðhjólum.

Lögreglan vill að lokum benda vegfarendum á leið um Dynjandisheiði á að vegurinn sé með versta móti þessa dagana. Ökumenn lítilla fólksbíla eru sérstaklega hvattir til að gæta varúðar því margar stórar holur eru í veginum og brúarendar geta verið hættulegir.