Nóg til af lækningatækjum á Íslandi en ekki á sjúkrahúsum

Mikið hefur verið rætt um skort á mikilvægum lækningatækjum á Íslandi sem og flótta lækna og hjúkrunarfræðingar frá landinu eftir hrun. Tinna Laufey Ásgeirsdóttir umsjónarmaður meistaranáms í heilsuhagfræði við Háskóla Íslands sagði á Sprengisandi á Bylgjunni í morgun segir útgjöld til heilbrigðismála hér mjög álíka og meðalútgjöld OECD ríkjanna. En þar séu lönd auðvitað misjöfn.

„Löndin sem eru hærri en við eru frekar þau lönd sem við höfum viljað bera okkur saman við. Það eru lönd í vestur Evrópu , það eru Norðurlöndin, Holland, Þýskaland, Sviss og svo framvegis. Þannig að ef við viljum bera okkur saman við þessi lönd eru útgjöld til heilbrigðismála lægri hér á Íslandi,“ sagði Tinna Laufey.

Laufey segir mikið hafa heyrst frá Landsspítalanum að þar vanti tæki. Algengt sé að nota fjölda segulmyndatækja og sneiðmyndatækja sem mælikvarða á ástand mála hjá löndum.

„Því að ég held að það sé raunverulegur skortur. Ég er ekki að gera lítið úr því. En hins vegar erum við vel yfir meðaltalinu hvað varðar þessi tæki, hversu mörg svona tæki við erum með pr. hundrað þúsund íbúa. Aftur á móti sjáum við að skiptingin á þessum tækjum  að þau eru mun meira fyrir utan sjúkrahús.“

Þannig að þegar komi að fjölda þessara tækja á sjúkrahúsum sé Ísland undir meðaltali OECD.

„Þau eru þá að einhverju leyti hjá sérfræðingum. Auðvitað þarf að einhverju leyti meira af tækjum í landi sem strjálbýlt og oft erfitt yfirferðar á vissum árstímum. En það eru þó inni í þessum samanburði mörg önnur lönd sem eru þannig líka. Svæði í norður Finnlandi, Noregi og fleiri stöðum. Þannig að við erum ekki ein á báti með það og það eru aðrir hlutir sem vinna með okkur, eins og það að við erum mjög ung þjóð,“ sagði Tinna Laufey Ásgeirsdóttir heilsuhagfræðingur.