Heyrir níðsöngvana úr stúkunni

„Sem stuðningsmenn og fótboltafólk verður við að íhuga hvernig við látum á pöllunum," segir Bjarni Guðjónsson, fyrirliði karlaliðs KR í knattspyrnu.

Bjarni var í viðtali við útvarpsþáttinn Fótbolti.net á X-linu 977 í dag. Hann var spurður út í stemmninguna á áhorfendapöllunum í Pepsi-deildinni en Bjarni hefur fengið sinn skammt af níðsöngvum frá stuðningsmönnum andstæðinganna.

„Það hefur nákvæmlega engin áhrif á mig hvað er öskrað inn á völlinn. Ef eitthvað er þá hvetur þetta mig áfram. En það hlýtur að vera hægt að finna leið þar sem þetta þarf ekki að vera svona ljótt," segir Bjarni.

Fyrr í sumar bað Silfurskeiðin, stuðningssveit Stjörnunnar, Bjarna afsökunar vegna söngva sinna um hann. Þótt söngvarnir hvetji hann til frekar til dáða en hitt hefur hann samt áhyggjur af fjölskyldu sinni í stúkunni.

„Það er aftur á móti vera fyrir þau," segir Bjarni. „Þau eru orðin öllu vön en heilt yfir, fyrir þessa fallegu íþrótt, eigum við ekki að vera að velta okkur í þessu drullumalli."

Bjarni segist heyra flesta söngva inn á völlinn. Ekki síst ef vindurinn blæs frá stúkunni og inn á völlinn. Rætt hefur verið um að stuðningsmenn erlendis hegði sér mun verra en íslenskir stuðningsmenn. Bjarni segir það aukaatriði.

„Við getum ekki borið okkur saman við það sem gerist á Englandi þar sem þú veist ekki hver öskrar. Hér líturðu upp í stúku, sérð hver öskrar og veist nánast hvar hann á heima," segir Bjarni. Hafa verði í huga að börn séu í stúkunni.

„Börnin læra það sem fyrir þeim er haft. Við verðum að finna leið því krakkarnir okkar alast upp í þessu umhverfi. Svo verða þau fullorðin, mæta á völlinn og taka eitt skref í viðbót," segir Bjarni. Hann vill að fjölskyldur geti mætt áhyggjulausar á völlinn og ekki verði komin sérstök hólf fyrir ólátastuðningsmenn eftir tíu til fimmtán ár.

Fjallað hefur verið um hegðun áhorfenda í Pepsi-deildinni í sumar hér á Vísi. Fréttirnar má sjá hér að neðan.