Dögun og Flokkur heimilanna íhuga að bjóða aftur fram

Tvö framboð sem buðu fram til þingkosninga síðasta vor íhuga alvarlega að bjóða sig fram á ný fyrir sveitarstjórnarkosningarnar.

Það eru Flokkur heimilanna og Dögun. Framboðin fengu bæði um og yfir 3 prósent í síðustu alþingiskosningum og eiga þar af leiðandi rétt á fjárstyrk úr ríkissjóði.

„Það hefur ekki verið tekin nein ákvörðun enn þá en það verður gert nú í haust,“ segir Pétur Gunnlaugsson, formaður Flokks heimilanna. Hann telur líklegt að flokkurinn fari fram í Reykjavík fyrir næstu borgarstjórnarkosningar. Pétur segir að þá yrði lögð þung áhersla á að Reykjavíkurflugvöllur yrði áfram í Vatnsmýrinni.

Margrét Tryggvadóttir, fyrrverandi þingmaður og liðsmaður Dögunar, segir að það eigi eftir að ákveða hvort Dögun fari fram. Þar sé mikill áhugi. Lýður Árnason, sem var oddviti Lýðræðisvaktarinnar í Suðvesturkjördæmi í síðustu kosningum, segir samtökin ekki stefna á framboð.

„Svarið er bara nei,“ svarar Lýður aðspurður um mögulegt framboð. Ekki náðist í Pírata.