Ferðamenn frá Kína eru fémildastir allra

Kínverskir ferðamenn eyða mest hér á landi samkvæmt tölum frá Global Blue á Íslandi, sem er eitt þeirra fyrirtækja sem halda utan um endurgreiðslur á virðisaukaskatti til ferðamanna. Meðalfærsla Kínverja er 24.147 krónur en meðalfærsla erlendra ferðamanna hér á landi er tæpum tíu þúsund krónum lægri, eða 15.570 krónur.

Rússar eru heldur ekki fastheldnir á eyrinn því meðalfærsla þeirra er 20.390 krónur. Því miður fyrir gjaldeyrisþyrsta þjóð er hlutfall ferðamanna frá þessum þjóðum ekki hátt.

Þessar tölur komu Andreu Falkvard, verslunarstjóra Rammagerðarinnar í Hafnarstræti í Reykjavík, ekki á óvart. „Kínverjarnir kaupa kannski ekki svo margar vörur en þetta eru allt kostagripir sem þeir kaupa,“ segir hún.

„Í síðustu viku kom til mín kínverskur hópur og þá seldi ég til dæmis tvo uppstoppaða lunda. Marga Íslendinga dreymir kannski um það en eru kannski ekki tilbúnir að borga 30 þúsund kall fyrir. Svo keyptu þeir refafeldi og sitthvað fleira. Við kætumst líka þegar við sjáum Rússana koma en þeir kaupa meira og virðast lítið spá í það hvað þeir setja ofan í körfuna. Þeir borga líka alltaf í reiðufé og halda ekki fast um það.“

Kristján Másson hjá Global Blue á Íslandi er líka kátur með þessa ferðamenn. „Það er mikilvægt að ýta undir aukningu ferðamanna sem eyða miklu eins og Rússar og Kínverjar,“ segir hann.

„Þótt fólk frá þessum þjóðum sé ekki með stórt hlutfall af heildareyðslu á markaðnum hér á landi eyðir það mjög miklu í verslun miðað við þann fjölda sem kemur frá þessum þjóðum.“

En ekki er gróðavonin mikil hjá Andreu þegar Bretinn kíkir inn í Rammagerðina. „Þeir láta sér oftast nægja að kaupa eina lyklakippu og kannski splæsa þeir í eitt póstkort líka,“ segir hún kankvís.

Hvað heildarneyslu varðar hafa Bandaríkjamenn vinninginn en á eftir þeim koma Norðmenn. Kristján segir að sala til erlendra ferðamanna hafi breyst mikið síðustu árin. Til dæmis sé vertíðin að lengjast og þakkar hann það átakinu Ísland allt árið og einnig samhentu átaki aðila í ferðaþjónustunni.

Andrea segist hafa byrjað fyrir fimm árum. „Þá var voða mikið um „Made in China“ en nú er mun meira um íslenskar hágæðavörur og skemmtilegra að eiga við kúnnana,“ segir hún.