Páll Óskar treystir á að Sigmundur Davíð bjargi NASA

"Ég held í vonina og ég ætla ekki að gefast upp," segir poppkóngurinn Páll Óskar Hjálmtýsson sem berst enn fyrir því að skemmtistaðurinn NASA við Austurvöll verði ekki lagður niður í þeirri mynd sem hann var í áður. Hann segir forvitnilegt að sjá hvort að forsætisráðherra muni beita sér í málinu enda hafi hann lengi talað fyrir því að vernda gömul hús.

Rúmlega tvö hundruð tónlistarmenn og hljómsveitir hafa skrifað undir yfirlýsingu þar sem mótmælt er áformunum um breytingar á svæðinu, þar sem meðal annars er gert ráð fyrir að NASA verði ekki lengur skemmtistaður.

Þá er skorað á kjörna fulltrúa í borgarstjórn að endurskoða þá tillögu sem liggur fyrir að deiliskipulagi og leggja sitt að mörkum til að Nasasalurinn fái að standa í upprunalegri mynd og nýtast á sama hátt og verið hefur.

Páll Óskar segir að ný staða sé komin upp í málinu, nú þegar að ríkisstjórn Sjálfstæðisflokksins og Framsóknar tók við völdum.

„Það vill svo til að Sigmundur nokkur Davíð er í forsvari þar, og hann er sérstakur áhugamaður um verndun gamallra húsa í miðbænum og íslenskra minja, þjóðararfsins eins og hann kallar það. Hann er búinn að ganga það langt að allar ákvarðanir um gömul hús í Reykjavík fara ekki lengur í gegnum menntamálaráðherra, heldur í gegnum hann persónulega,“ segir hann.

„Þetta er persónulegt áhugamál hjá honum. Nú verður forvitnilegt að sjá hvort að Sigmundur Davíð sé trúr sinni sannfæringu eða hvort hann láti hagsmuni sinna flokksbræðra ráða,“ segir Páll Óskar.

Og bendir á að Pétur Þór Sigurðsson, eigandi NASA, sé í Framsóknarflokknum og eiginmaður Jónínu Bjartmarz, fyrrverandi þingmanni Framsóknarflokksins. „Þetta er mjög spennandi staða,“ segir hann.

Þann 8. júlí næstkomandi verður haldinn fundur á Ingólfstorgi og á Austurvelli, en Páll Óskar segir það verða stóra útitónleika.

„Við eigum enn eftir að staðfesta listamennina sem koma þar fram. En við ætlum að sýna með málbandi að það séu 50 metrar á milli hótelsins og Alþingishússins. Það er Evrópumet, hvergi í Evrópu er nálægðin svona mikil á milli þjóðþings og hótels,“ segir Páll Óskar.

Hér má sjá bloggfærslu Sigmundar Davíðs um skipulagsbreytingar á svæðinu.