Ekkert þvottaplan í Borgarnesi

„Fólk er að undra sig á því að erfitt sé að komast í að þvo bíla,“ segir Theódór Jónsson, lögreglumaður í Borgarnesi, en margar fyrirspurnir hafa borist um hvar hægt sé að nálgast þvottaplan. Ekkert þvottaplan er í Borgarnesi og hefur ekki verið í nokkur ár.

„Þar af leiðandi er erfitt fyrir ferðafólk og húsbíla að komast í vatn,“ útskýrir Theódór. Hann segir slökkviliðsstjóra bæjarins hafa blöskrað vatnsleysið svo hann setti upp vatnsslöngu fyrir utan stöðina þar sem hægt er að komast í vatn.

„Það er önugt að geta ekki þrifið bílana,“ viðurkennir Theódór. „Sem almennum borgara finnst mér þetta vera hluti af þjónustunni.“ Hann segir íbúa bæjarins hafa gripið til þess að koma sér upp bílaþvottaaðstöðu heima við.

Þórður Jónsson, verslunarstjóri Olís Borgarnesi, segir það hugsanlegt að við Olís Brúartorgi verði komið upp þvottaaðstöðu. „Það er pirrandi að geta ekki þvegið bílinn sinn,“ segir hann. „En það kostar mikið að koma þessu af stað og það er mikið mál.“ Að hans sögn hefur fólk farið illa með bílaþvottaaðstöðu áður.