Setti fimm Íslandsmet á sama deginum

Hjörtur Már Ingvarsson úr Íþróttafélaginu Firði gat verið himinlifandi með afrakstur sinn á þriðjudaginn á HM fatlaðra í sundi en mótið fer að þessu sinni fram í Montréal í Kanada. Hann hélt síðan áfram að bæta sig í 200 metra fjórsundi í gær.

Það er hinsvegar óhætt að segja að Hjörtur Már hafi verið í miklu stuði í 200 metra skriðsundi í flokki S5 því hann setti fimm ný Íslandsmet á sama deginum en þau komu bæði í undanrásum og úrslitum. Hann endaði að lokum í sjöunda sæti í greininni.

„Í undanrásum setti Hjörtur tvö ný met þegar hann synti á 3.16.49 mínútum en metin voru á millitímum í 50 metra og 100 metra skriðsundi. Í úrslitum fór Þorlákshafnarjakinn einfaldlega á kostum og synti á 3.10.84 mínútum og stórbætti Íslandsmetið sitt um tæpar sex sekúndur," segir í frétt á heimasíðu Íþróttasambands fatlaðra.

Hjörtur Már er 17 ára gamall (verður 18 í október) og kemur frá Þorlákshöfn. Þetta voru langt frá því að vera fyrstu Íslandsmet kappans en væntanlega í fyrsta sinn sem hann nær að bæta fimm þeirra á sama deginum.

Hér fyrir meðan má sjá myndaband um kappann á heimasíðu Íþróttasambands fatlaðra - http://www.ifsport.is.