Sérfræðingahópar um skuldavanda heimilanna hafa ekki hafið störf

Tveir mánuður eru síðan aðgerðaráætlun ríkisstjórnarinnar var lögð fram á Alþingi og samþykkt af meirihluta. Viðamesta verkefnið á þeim lista er tvímælalaust að ná fram höfuðstólslækkun verðtryggða húsnæðislána og átti að skipa hóp sérfræðinga til þess. Hann hefur þó ekki verið settur saman þó rétt um 10 vikur sé í að hann eigi að skila af sér tillögum til lausnar vandans.

Samþykkt var á fyrsta ríkisstjórnarfundi nýrrar ríkisstjórnar í maí að skipa sérstaka ráðherranefnd um úrlausnir á skuldavanda heimilanna. Í nefndinni eiga sæti Sigmundur Davíð Gunnlaugsson, forsætisráðherra, Eygló Harðardóttir, félagsmálaráðherra, Bjarni Benediktsson, fjármálaráðherra og Hanna Birna Kristjánsdóttir, innanríkisráðherra. Skömmu síðar var síðan lögð fram Aðgerðaráætlun í tíu liðum til að taka á skuldavanda heimilanna. Ráðuneytin skiptu með sér verkum í þessari áætlun.

 Tvær fyrstu tillögurnar í aðgerðaráætluninni og óumdeilanlega þær viðamestu eru á ábyrgð forsætisráðuneytisins. Þar segir í fyrsta lagi að setja eigi á fót sérfræðingahóp sem útfæra eigi mismunandi leiðir til að ná fram höfuðstólslækkun verðtryggða húsnæðislána. Tillögur eiga að liggja fyrir í nóvember. Í öðru lagi á hópur sérfræðinga að gera tillögur að því hvenær og hvernig sé hægt að afnema verðtryggingu af neytendalánum. Hvorugur þessara hópa hefur hafið störf. Reyndar er ekki enn búið að skipa þá sem sitja í þeim. Samkvæmt heimildum fréttastofu hafa margir þingmenn Sjálfstæðisflokksins áhyggjur af því að sérfræðingahóparnir hafi ekki enn hafið störf. Verkefnið sé ærið og mikilvægt sé að almenn sátt ríki um tillögur hópsins enda málið afar stórt í sniðum. Sigmundur Davíð Gunnlaugsson, forsætisráðherra er staddur í Noregi og átti ekki kost á að veita fréttastofu viðtal. Jóhannes Þór Skúlason, aðstoðarmaður Sigmundar sagði í samtali við fréttastofu að væntanlega munu starfshóparnir hefja störf innan tíðar og að undirbúningur við þá sé á síðustu metrunum.

Sú vinna sem snýr að öðrum ráðuneytum í aðgerðaráætlun ríkisstjórnarinnar er hafin og sérfræðingahópar skipaðir þar sem við á. Samkvæmt upplýsingum frá ráðuneytum félagsmála og fjármála er vinna þar á áætlun.