Stærsta gjöf Íslandssögunnar í uppsiglingu í komandi kjarasamningum

Samninganefnd Drífanda stéttarfélags í Vestmannaeyjum lýsir yfir þungum áhyggjum af þróun samningaviðræðna milli atvinnurekenda og launafólks undanfarna daga. Í ályktun félagsins segir að enn eina ferðina eigi að skammta almennu verkafólki skammarlegar upphæðir meðan hálaunafólk fái hundruð þúsunda í mánaðarhækkanir á sín laun.

Það alvarlega í málinu sé að hugmyndir um þessar nánasarlegu hækkanir komi einar og óstuddar innan úr herbúðum verkalýðshreyfingarinnar og sem grafi undan lífsafkomu fólks,  en tryggi forystumönnum hennar tugum og  hundruðum prósenta meiri launahækkanir en ætlaðar séu almennum félagsmönnum.

„Sannarlega er misjafnt hve mikið atvinnugreinar þola að taka á sig launahækkanir. En algjörlega er ljóst að útflutningsatvinnugreinar myndu þola tugprósenta launahækkun í ljósi tugmilljarða afkomu þeirra undanfarin ár og í ljósi afsláttar er mörg þeirra hafa fengið á auðlindagjaldi,“ segir í ályktun Drífanda. Það sæti því furðu að í uppsiglingu sé framhald á einni stærstu gjöf Íslandssögunnar fyrr og síðar til fiskvinnslunnar í landinu í boði verkalýðshreyfingarinnar, í formi launaafsláttar.

Þeir sem þurfi að bera þessa gjöf til atvinnurekenda í launaumslögum sínum sé fólk á töxtum sem séu undir og rétt við lögbundin lágmarkslaun í landinu. Sama fólk og muni verða skilið eftir hvort sem skattlækkunartillögur ríkisstjórnarinnar eða ASÍ verð að veruleika.

„Samninganefnd Drífanda skorar á samninganefndir Starfsgreinasambandsins og ASÍ að hysja upp um sig buxurnar, koma sér út úr þægindahringnum, og sækja launin sem sannarlega er innistæða fyrir til fyrirtækjanna,“ segir í ályktuninni, en þar er vísað til fiskvinnslunnar sem hagnast hafi á falli krónunnar undanfarin ár.