Björn svaraði ekki símanum

Björn Bergmann Sigurðarson svaraði ekki símtali Lars Lagerbäck landsliðsþjálfara sem vildi ná tali af honum vegna landsleiksins gegn Slóveníu í næstu viku.

Björn hefur ekki gefið kost á sér í landsliðið að undanförnu til að einbeita sér að ferli sínum hjá enska B-deildarliðinu Wolves. „Ég lít þannig á málið að hann telji sig ekki enn tilbúinn fyrir landsliðið. Ég vil ekki setja pressu á hann," segir Lagerbäck, sem segist ekki vera óánægður með afstöðu Björns.

„Hún kemur mér á óvart enda tel ég gott fyrir alla unga leikmenn að fá að spila með landsliði sínu. En ég trúi ekki á að tala leikmenn til að spila með landsliðinu. Hann verður samt ávallt velkominn í liðið."