Skipulag jólasveinsins slær í gegn

Ragnheiður Stefánsdóttir, þriggja barna móðir, segir jólasveininn vera duglegan að gefa börnunum sínum hagnýtar og skemmtilegar gjafir sem kosta þó ekki of mikið. „Hér er haft að leiðarljósi að gjafirnar veiti okkur fjölskyldunni gleðistundir á morgnana og veki eftirvæntingu. Við vöknum alltaf aðeins fyrr á morgnana í desember til að geta skoðað gjafirnar saman í rólegheitunum.“

Ragnheiður segir skipulag og hagkvæmni gera jólasveininum auðveldara að slá í gegn. „Það er gott að vera með opin augun allan ársins hring og fylla smátt og smátt í jólageymsluna. Svo fá börnin líka eitthvað sem þeim vantar hvort eð er, til dæmis tannbursta, jólasokka og nærföt. En líka eitthvað óvænt og spennandi sem vekur upp sérstaka kátínu. Best er þegar fjölskyldan getur skemmt sér saman yfir skógjöfunum. Verst er þegar það skapast stress á síðustu stundu og jólasveinninn þarf að bjarga málunum í næstu 10/11. Fyrirhyggjusemi margborgar sig.“

Ragnheiður nýtur þess að vera í foreldrahlutverkinu í desember og býr til sérstök dagatöl fyrir börnin. „Upphaflega voru þetta litlar gjafir en nú gef ég samverustundir foreldra og barna. Á hverjum morgni opna börnin miða sem gefur samverustund eins og tásunudd, spilakvöld, rafmagnslaust kvöld og föndurstund. Enn og aftur þarf að passa sig að fara ekki yfir strikið og bjóða upp á yfirgengilega skemmtidagskrá sem er ekki í takt við raunveruleika, fjármagn og tíma.“

Hún segir drengina sína í skýjunum með samvistardagatalið og kjósa frekar samveru en dót. „Þetta hvetur enn frekar til samverustunda með fjölskyldunni en þetta má auðvitað ekki verða kvöð eða aukaálag. Það er bara svo gott að jarðtengja sig og eiga stund í rólegheitum, þá gleymir maður sér síður í jólaatinu. Börnin mín hafa líka haft orð á því að desember sé orðinn miklu meira kósý með samvistardagatalinu.“

Mörg foreldrafélög setja sameiginlegar reglur fyrir börnin sín og samræma til dæmis kostnað vegna afmælisgjafa. Bryndís Jónsdóttir, framkvæmdastjóri SAMFOK, veit ekki til þess að foreldrafélag hafi haldið fund með jólasveininum í desember.

„Umræðan um misdýrar skógjafir kemur upp á hverju ári. Það er því full ástæða til að hvetja foreldra til að taka sig saman innan bekkja og árganga og finna reglu sem jólasveinarnir geta sæst á.“

SAMFOK heldur námskeið á hverju hausti fyrir bekkjarfulltrúa þar sem hvatt er til þess að foreldrar hittist meira, spjalli saman og setji sameiginlegar reglur.

„Þetta hefur borið góðan árangur. Það verður einfaldara að leysa vandamálin og skilja önnur sjónarmið þegar fólk hittist í eigin persónu. Börnin okkar eru hluti af skólasamfélagi, er ekki eyland í skólanum. Því ber okkur skylda til að vera þorpið sem elur upp barnið og standa saman í svona málum sem eru mikilvæg fyrir börnin okkar,“ segir Bryndís.