Sveitarfélög draga siðareglur á langinn

Um fjörutíu sveitarfélög af 75 hafa ekki sett sér siðareglur eins og sveitarstjórnarlög frá 1. janúar 2012 kveða á um.

„Við höfum verið að hvetja þau áfram í þessu,“ segir Guðjón Bragason, sviðsstjóri lögfræði- og velferðarsviðs Sambands íslenskra sveitarfélaga, spurður út í seinaganginn.

Í 29. grein sveitarstjórnarlaganna segir meðal annars að öllum kjörnum fulltrúum í sveitarstjórn og nefndum og ráðum sem sveitarstjórn skipar ber að haga störfum sínum í samræmi við settar siðareglur.

„Sveitarfélögin eiga að vera búin að þessu og það er enginn skortur á leiðbeiningum um það. Það er sérstök síða um siðamál á heimasíðu sambandsins sem við höfum vísað mikið á,“ segir Guðjón.

Samkvæmt upplýsingum frá innanríkisráðuneytinu er hugsanlegt að hluti sveitarfélaganna fjörutíu vilji nota áfram eldri siðareglur sem þau hafi sett sér en eigi eftir að leita staðfestingar hjá ráðuneytinu um að fá að nota þær.

Samband íslenskra sveitarfélaga hefur heldur ekki skipað nefnd sem skal gefa álit um siðareglur og ætluð brot á þeim. Þau sveitarfélög sem hafa þegar sett sér siðareglur geta því ekki vísað málum til nefndarinnar, þar sem hún er ekki til staðar.

Guðjón viðurkennir að stofnun nefndarinnar hafi dregist á langinn en tekur fram að eftirspurnin eftir henni hafi ekki verið til staðar hjá sveitarfélögum. „Ég get sagt það hreint út að þetta mál hefur ekki verið í efsta forgangi hjá okkur. Innleiðing þessara sveitarstjórnarlaga er heilmikið dæmi, þar sem menn lögðu áherslu á fjármálareglurnar. Síðan hafa þessi verkefni verið að koma koll af kolli.“

Hann segir undirbúninginn fyrir því að koma nefndinni á laggirnar vera þokkalega langt kominn. Markmiðið er að þrír óháðir aðilar verði í nefndinni og verður hún skipuð til fjögurra ára í senn. Einn aðili verði með sérþekkingu á siðfræði, annar á lögfræði og sá þriðji með víðtæka reynslu af sveitarstjórnarmálum.

„Þessi nefnd var ekki hugsuð sem úrskurðarnefnd um ágreining. Hún á að reyna að vera styðjandi við þetta ferli. Veita almenn sjónarmið, frekar en að höggva á hnúta í erfiðum málum. Best væri ef hún hefði sem minnst að gera,“ segir Guðjón.

Kópavogur fyrst til að skila

Kópavogur var fyrsta sveitarfélagið til að skila siðareglum. Á meðal annarra sem eru búin að því eru Reykjavík, Hafnarfjörður, Mosfellsbær, Reykjanesbær, Borgarbyggð, Seltjarnarnes, Árborg, Seyðisfjörður, Blönduósbær, Skagafjörður og Ásahreppur.