Facebook-hrekkur vina kveikti ástarbál

Þau Júlíus Brynjar Kjartansson og Herdís Sif Rúnarsdóttir höfðu ekki hugmynd um að leiðir þeirra myndu liggja saman fyrir rúmlega ári þegar þau fóru inn á Facebook. Vinir Júlíusar voru í heimsókn hjá honum og ákvað hann að stökkva út í búð til þess að kaupa eitthvað til að bjóða þeim upp á en gleymdi að skrá sig út af Facebook.

Vinirnir sáu sér þá leik á borði og ákváðu að hrekkja Júlíus, eins og tíðkast þegar fólk gleymir að skrá sig út af Facebook.

„Þeir potuðu í fullt af stelpum og sendu út örugglega hundrað vinabeiðnir. Þetta var rosalegt,“ rifjar Júlíus Brynjar upp. Hann gerði sér grein fyrir hrekknum þegar hann kom heim úr búðinni. „Ég fór á Facebook og sá hvað þeir höfðu gert. Fljótlega sá ég að ein stelpa, sem mér leist alveg hrikalega vel á, var búin að senda mér skilaboð,“ segir Júlíus.

Hann greip tækifærið og hóf djúpar samræður á netinu. „Þetta small bara strax og við ákváðum að hittast daginn eftir.“

Júlíus, sem er búsettur á Selfossi, gerði sér ferð til Reykjavíkur til þess að hitta þessa efnilegu stúlku, strax daginn eftir að þau töluðu saman á Facebook í fyrsta sinn. „Ég sótti hana í vinnuna og við tókum góðan rúnt. Við spjölluðum um heima og geima og ég sá strax að við pössuðum rosalega vel saman.“

Parið hefur nú verið saman í heilt ár og býr nánast saman. „Ég leigi íbúð á Selfossi og hún býr hjá foreldrum sínum í Reykjavík. Við skiptumst á að vera hvort heima hjá öðru. Ég ákvað að skipta um vinnu og fékk mér vinnu í bænum til þess að geta verið nær henni,“ útskýrir Júlíus Brynjar sem heldur að þau muni á endanum flytja saman á Selfoss.

Vinir hans eru auðvitað ánægðir með að hafa kveikt þetta ástarbál. „Ég sagði þeim strax um kvöldið sem þeir gerðu mér hrekkinn að við Herdís ætluðum að hittast daginn eftir. Þeir svöruðu bara: „Já, sæll!“ Þeir hafa grínast mikið með þetta en þykir þetta samt alveg frábært mál.“ Júlíus segist ánægður með tengdafjölskylduna og vonar að sú ánægja sé gagnkvæm. Hann hlakkar mikið til jólaboðanna með ástinni sinni. Ástarbálið, sem varð til vegna Facebook-hrekksins, logar glatt.