Í kvikmynd sem fer á Sundance

Kvikmyndin Land Ho!, sem rapparinn Emmsjé Gauti leikur í, er á leiðinni á kvikmyndahátíðina Sundance. Gauti leikur lítið hlutverk í myndinni en segja má að hann hafi verið réttur maður á réttum stað þegar myndin var gerð.

„Fólkið á bak við myndina var statt hér á landi við tökur. Ég afgreiddi hluta hópsins á skemmtistaðnum Dolly‘s. Einhverjum þeirra þótti ég fullkominn í ákveðið hlutverk. Síðan kom í ljós að ég átti að leika einhvern sturlaðan gaur sem var að gefa „glowsticks“,“ segir Gauti. Hann reiknar ekki með því að fylgja aðstandendum myndarinnar á Sundance.

„Ég mæti ef þau bjóða mér, sem ég efast um að gerist.“

Gauti gladdist ótrúlega þegar hann sá nafn sitt á kvikmyndagagnagrunninum IMDb.com og íhugar nú að leggja leiklistina fyrir sig. „Það var frábært að sjá nafnið sitt á IMDb. Ég er bara að hugsa um að setja tónlistina og vinina til hliðar og hella mér í kvikmyndaleik,“ segir Gauti í gamni en verður svo ögn alvarlegri:

„Þetta er fyrst og fremst bara skemmtilegt krydd í tilveruna.“