Bjóða bankalaus kortaviðskipti

„Það eru greinilega hópar fólks sem sjá þörf á því að geta stundað viðskipti án þess að vera með reikning í banka og velja kort sem fer ekki í manngreinarálit,“ segir Ingólfur Guðmundsson, framkvæmdastjóri iKort.

Fyrirtækið hóf nýverið dreifingu á greiðslukortinu iKort, sem er frábrugðið öðrum kortum að því leyti að það er ekki tengt við bankareikning. Það er inneignarkort sem er gefið út á vegum breska fyrirtækisins Prepaid Financial Services, sem lýtur að sögn Ingólfs eftirliti breska fjármálaeftirlitsins.

„Korthafi þarf því ekki leyfi viðskiptabankanna til að stofna eða nota kortið eða fara í greiðslumat. Það eru yfir þrjátíu þúsund aðilar sem fá ekki greiðslukort í dag og margir þeirra eru búnir að fara í gegnum erfiða tíma og eru ekki alltaf ánægðir með sinn viðskiptabanka. Síðan er fullt af fólki sem vill ekki nota sín greiðslukort þegar það verslar á netinu,“ segir Ingólfur og tekur fram að það séu fyrst og fremst þessir tveir hópar fólks sem hafi sótt um kortið.

„Við erum ekki í útlánastarfsemi enda erum við bara tvö sem störfum á skrifstofunni. Fyrirtækið er ekki vörsluaðili þeirra fjármuna sem notendur leggja inn á kortin en fyrirtækið hefur hins vegar stofnað sérstakan reikning í viðskiptabanka þar sem inneignirnar eru geymdar.“

Spurður um hvaðan hugmyndin að dreifingu kortsins hér á landi sé komin segir Ingólfur að hún sé upphaflega komin frá Viktori Ólafssyni, fyrrverandi forstjóra Kreditkorta hf. Hann segir einnig að kortið sé fyrsta greiðslukort sinnar tegundar hér á landi.

„Þetta er sú tegund korta sem er að vaxa hvað mest í heiminum í dag. Kortið er alþjóðlegt og það er hægt að nota það á yfir 32 milljón stöðum í heiminum og þar með talið í hraðbönkum þar sem Mastercard er með samninga. Korthafar þurfa því ekki að sækja um ferðagjaldeyri í reiðufé áður en farið er til útlanda og einnig er hægt að nota það til að koma peningum til vina og vandamanna í útlöndum,“ segir Ingólfur.