Lagði lífið að veði til að halda jól hátíðleg

„Jólin fyrir mér eru persónuleg. Þó að ég tilheyri múslimafjölskyldu, fögnuðum við alltaf jólunum í Beirút,“ segir Mazen Maarouf, palestínskt ljóðskáld og þýðandi sem var bjargað hingað til lands árið 2011 af samtökunum ICORN í samstarfi við Reykjavíkurborg.

Honum höfðu borist líflátshótanir vegna blaðaskrifa sinna um stjórnmál, þar sem hann talar fyrir friði og jafnrétti kynjanna, í Miðausturlöndum.

Sjálfur er Mazen palestínskur að uppruna en hefur alla tíð haft stöðu flóttamanns í Líbanon. Hann fæddist árið 1978 í Beirút.

„Við áttum jólatré úr plasti, sem við fengum að gjöf frá vinkonu móður minnar. Það var ekki í sérstaklega góðu ásigkomulagi, en það skipti ekki öllu máli. Á hverju ári hlökkuðum við til að setja upp tréð, um miðjan desember. Faðir minn skreytti tréð með sama skrautinu, það var gamalt skraut sem mátti muna fífil sinn fegurri, en það skipti engu máli,“ segir Mazen.

Á þessum tíma ríkti stríðsástand í Líbanon.

„Stríðið var á ákveðinn hátt á milli múslima og kristinna eða hægri- og vinstrisinnaðra, líbanskra, palestínskra og sýrlenskra borgara. Þannig tókum við mikla áhættu, að fagna kristinni hátíð eins og jólum, í Líbanon á tímum stríðs. Jólin voru ein ástæða þess að ég gerði mér grein fyrir að mannréttindi eru mikilvægari en blind trú á hugmyndafræði einna trúarbragða,“ segir Mazen.

Mazen er gríðarlega spenntur að fagna jólunum á Íslandi í fyrsta sinn, og kannski það eina, en hann hefur sótt um ríkisborgararétt á Íslandi sem hann fær skorið úr um á næstu vikum.

„Ég er fullur tilhlökkunar. Ég á djúpa tengingu við landið og marga vini. Mér þykir svo vænt um fólkið mitt hér. Þó að ég sé ekki með fjölskyldunni minni er vel séð um mig. Ég á meira að segja íslenska mömmu!“ segir Mazen, léttur í bragði.

Mazen er um þessar mundir að vinna að fyrstu skáldsögu sinni.

„Mér hefur gengið rosalega vel að skrifa og þýða á Íslandi. Dvölin hefur verið eins og endalaus jól fyrir mig, þar sem er ekkert stríð og engin átök og mér líður óhultum,“ segir Mazen.