Vill herða reglur um rannsóknarnefndir

Kostnaður vegna rannsóknanefnda Alþingis hefur farið langt fram úr áætlun samkvæmt frumvarpi til fjáraukalaga sem lagt var fram á Alþingi í vikunni. Heildarkostnaður er kominn upp í rúmar 800 milljónir en um ræða annars vegar rannsóknanefnd um Íbúðalánsjóð og hins vegar rannsóknarnefnd um fall sparisjóðanna. Sú fyrrnefnda skilaði skýrslu í sumar en sú síðarnefnda hefur enn ekki lokið störfum. Upphaflega stóð til að vinnunni myndi ljúka um mitt ár 2012.

Ragnheiður segir nauðsynlegt að endurskoða tíma- og útgjaldaramma í tengslum rannsóknarnefndir. „Það er algjörlega ljóst að við getum ekki leyft okkur, hvort sem við eigum fullt af peningum eður ei, að setja á fót rannsóknarnefndir sem hafa svona víðtækar heimildir til tímafrestunar, til rannsókna og fjármagns,“ segir Ragnheiður og vill að Alþingi skoði málið.. „Það má vera einhver sveigjanleika í tímaramma og einhver sveigjanleiki í fjármagni en ekkki upp á mörg hundruð milljónir.“

Fram kemur í fjáraukalögum að rekstarkostnaður ríkisstjórnarinnar hefur aukist um eitt hundrað milljónir miðað við áætlun núgildandi fjárlaga eða um ríflega 30 prósent. Ríkisstjórnin hefur ennfremur verið gagnrýnd fyrir að fjölga ráðherraembættum og aðstoðarmönnum. Ragnheiður segir að biðlaun fyrrverandi ráðherra skýri þessa hækkun að sumu leyti. „Þessi kostnaður ríkisstjórnarinnar sem ekki var gert ráð fyrir í síðustu fjárlögum eru biðlaun fráfarandi ráðherra og aðstoðarmanna þeirra. Þannig að þetta er ekki eingöngu kostnaður við núverandi ríkisstjórn,“ segir Ragnheiður. Hún telur eðlilegt að sumir ráðherra séu með tvo aðstoðarmenn líkt og Bjarni Benediktsson, fjármálaráðherra.

„Þetta er ráðuneyti sem er bæði efnahagsráðuneyti og fjármálaráðuneyti. Aðstoðarmennirnir hafa þekkingu hvor á sínu sviði. Við getum líka horft til innanríkisráðherrans sem er með tvo aðstoðarmenn. Í því ráðuneyti eru sveitarstjórnarmál, dómsmál og innanríkismál. Þannig að það getur verið auðveldara að ná fram hagræðingu innan ráðuneyta ef þar eru sérfræðingar sem koma að málum. Menn verða líka að hafa í huga að þetta er starfsfólk sem fer [að loknu kjörtímabili] en verður ekki eftir í ráðuneytinu,“ segir Ragnheiður.

Galinn spurningaþáttur

Ragnheiður hefur gagnrýnt spurningaþáttinn Vertu viss sem hóf göngu sína á Rúv í nóvember og hefur tekið málið upp á Alþingi. „Mér finnst það algjörlega galið að Ríkisútvarpið sé að taka upp og stílfæra hér heima einhvern þátt sem gengið hefur í útlöndum [...] Mér finnst þetta ekki vera hlutverk RÚV. Ég hef sagt það upphátt og ég get sagt það hvar og hvenær sem er. Þetta er eitt af því sem verður skorið ef það þarf að draga saman því ekki hefur þetta listrænt eða menningarlegt gildi.“

Óheflaðir þingmenn

Um 14 prósent landsmanna bera traust til Alþingis samkvæmt könnun Félagsvísindastofnunar Háskóla Íslands sem var gerð í ágústmánuði síðastliðnum. Ragnheiður segir nauðsynlegt að bæta umræðuhefð á Alþingi. Þannig megi auka tiltrú og traust almennings. „Það verður hver og einn þingmaður að velta fyrir sér tungutaki sínu og orðfæri. Um leið og þingmenn gera það þá mun annað fylgja í kjölfarið. Við erum stundum mjög óvægin og óhefluð,“ segir Ragnheiður.

Hún vill einnig breyta þingsköpum til að styrkja stöðu stjórnarandstöðunnar á Alþingi og koma í veg fyrir málþóf. „Það verður að finna þannig flöt að stjórnarmeirihlutinn geti ekki bara valtað yfir minnihlutann þegar honum hentar. Mér finnst að það verði að tryggja það með einhverjum hætti að minnihlutinn hafi alltaf það vopn að geta með einhverjum hætti stöðvað mál. Það er nefnilega ekki þannig að öll mál sem koma frá stjórnarflokkunum séu rosalega góð og að minnihlutinn hafi alltaf rangt fyrir sér,“ segir Ragnheiður.

Viðtalið við Ragnheiði er hægt að sjá í þættinum Pólitíkin á www.vísir.is