Mega keyra á 130 á hraðbrautum

Ný ríkisstjórn í Noregi hefur það á stefnuskrá sinni að hækka hámarkshraðann á hraðbrautum í landinu úr 90 í 130 kílómetra á klukkustund.

Fram kemur í frétt á vef Félags íslenskra bifreiðaeigenda (FÍB) að 90 kílómetra hámarkshraðinn sé lægsti leyfilegi hámarkshraði á hraðbrautum í Evrópu.

Áður en hámarkshraðinn verður hækkaður verður farið yfir hraðbrautirnar og þess gætt að þær þoli aukinn hraða án þess að það kalli á auknar líkur á slysum samkvæmt stjórnarsáttmála Framfaraflokksins og Hægriflokksins. 

Nánar er fjallað um málið á vef FÍB.