Ríkið aðstoði gjaldþrota fólk

Frumvarp Eyglóar Harðardóttur, félags- og húsnæðismálaráðherra, sem snýr að kostnaði einstaklinga við gjaldþrot er efnislega tilbúið og er nú á borði fjármálaráðuneytisins í hefðbundnu kostnaðarmati.

Síðasti dagur til að leggja frumvarpið fyrir Alþingi er í dag og samkvæmt heimildum Fréttablaðsins er Eygló staðráðin í því að ná því í gegn.

Frumvarpið kveður á um að ríkisvaldið aðstoði þá einstaklinga sem eru ekki í fjárhagslegri stöðu til að greiða þær 250.000 krónur sem þarf til að fara í gjaldþrot. Ekki stendur til að fella upphæðina niður. Hjón sem vilja fara í gjaldþrot þurfa því að greiða hálfa milljón króna, sem mörgum hefur reynst óyfirstíganleg.

Þingsályktun um aðgerðir vegna skuldavanda heimilanna var lögð fram í sumar. Einn liður í ályktuninni snerist um að kanna hvernig eignalausum einstaklingum verði gert kleift að greiða kostnað vegna gjaldþrotaskipta á búi sínu og hafa velferðarráðuneytið og innanríkisráðuneytið unnið að málinu.

Hjá héraðsdómum landsins hefur uppkveðnum gjaldþrotaúrskurðum einstaklinga fjölgað úr 185 á árinu 2011 í 291 á árinu 2012, samkvæmt ársskýrslu Dómstólaráðs.