Kýs gagnrýni fram yfir hrós

Ragnar Sigurðsson knattspyrnumaður var spurður spjörunum úr í vikunni. Lífið komst að því að hann er einstaklega hreinskilinn á köflum og á það til að stara á frægt fólk. 

Nafn? Ragnar Sigurðsson

Aldur? 27 ára

Starf? Knattspyrnumaður

Hvern faðmaðir þú síðast?

Ég faðmaði Sölva Ottesen þegar ég kvaddi hann í Króatíu eftir landsliðsferðina.

En kysstir? Ég kyssti líka Sölva Ottesen.

Hver kom þér síðast á óvart og hvernig?

Vinur minn sem var ekki beint að koma mér á óvart en það kom mér hins vegar mjög mikið á óvart þegar ég sá hann rífa sigg af stóru tánni á sér og borða það.

Hvaða galla í eigin fari ertu búinn að umbera allt of lengi?

Ég er búinn að vera neikvæður og þrjóskur alltof lengi.

Ertu hörundsár? Ég held alveg örugglega að ég sé ekki hörundsár, kýs allavega gagnrýni fram yfir hrós.

Dansarðu þegar enginn sér til? Já, ég dansa einungis þegar enginn sér til.

Hvenær gerðirðu þig síðast að fífli og hvernig?

Ég man ekki hvenær ég gerði mig síðast að fífli, því miður, en ég er alltaf að segja eitthvað heimskulegt og óúthugsað við fólk. Ég sagði til dæmis einu sinni við liðsfélaga minn í Svíþjóð að mér þætti kærastan hans „ekkert svakalega sæt“.

Hringirðu stundum í vælubílinn?

Ég veit ekki alveg hvað það þýðir að hringja í vælubílinn en þegar væluþörfin kemur þá hringi ég í bestu vini mína og væli aðeins í þeim.

Tekurðu strætó? Ég tek aldrei strætó en ég tek oft metró. Hvað eyðirðu miklum tíma á Facebook á dag? Ég eyði alltof miklum tíma á Facebook og hata mig líka fyrir það.

Ferðu hjá þér þegar þú hittir fræga eða heilsarðu þeim? Hvorugt, en ég stari stundum á þá.

Lumarðu á einhverju sem fáir vinir þínir vita um þig?

Það vita það ekki margir en ég er viss um að það komi samt engum vini mínum á óvart að metið mitt í að leysa 3x3 Rúbiks-tening er 1 mínúta og 13 sekúndur.

Hvað ætlarðu alls ekki að gera um helgina? Um helgina ætla ég alls ekki að pirra mig á vælu- og sleikjustatusum hjá fólki á Facebook.