Mikil uppbygging í Vatnsmýri framundan

„Það er nóg komið af bölmóði og svartsýni. Við viljum lyfta því sem er í spilunum og hjálpar okkur að lyfta framtíðinni í Reykjavík,“ segir Dagur B. Eggertsson, formaður borgarráðs, sem mun fjalla um framtíðarsýn aðalskipulags fyrir Vatnsmýrina á málþingi í dag sem ber yfirskriftina Tækifærin í Vatnsmýrinni.

Fulltrúar frá hagsmunaaðilum á svæðinu munu einnig taka til máls á málþinginu en enginn sem tengist flugstarfsemi.

„Framtíðarsýnin sem við tölum um í dag stendur ekki og fellur með hvar flugvöllurinn verður. Þetta er allt svæði sem hægt er að nýta óháð því og við eigum að nýta tækifærið strax til að efla þekkingarhagkerfið og draga alþjóðafyrirtæki á þetta svæði.“

Háskólinn í Reykjavík heldur málþingið í samstarfi við Reykjavíkurborg. „Það eru heilmörg tækifæri sem felast í því að þrjár öflugar mennta- og rannsóknastofnanir séu svo nálægt hver annarri. Það býr til tækifæri til að búa til þungavigtarmiðju þekkingar, uppbyggingar, menntunar og nýsköpunar í Vatnsmýrinni,“ segir Ari Kristinn Jónsson, rektor HR.

Kristín Ingólfsdóttir, rektor Háskóla Íslands, vill leggja áherslu á byggingu nýs Landspítala. „Samstarf spítalans við háskólann er gríðarlega mikilvægt fyrir menntun heilbrigðisstétta sem og rannsóknir og sprotafyrirtæki sem hafa orðið til í tengslum við þessa samvinnu. Þessi uppbygging er liður í því að hér verði framsækin heilbrigðisþjónusta í framtíðinni.“

Páll Matthíasson, forstjóri Landspítalans, segir Landspítala eiga að vera þekkingarfyrirtæki í fararbroddi á heimsmælikvarða. „Staðsetning í nálægð við háskólana er ein meginforsenda þess að framtíðaruppbygging verði farsæl,“ segir Páll.

Á kortinu má sjá fjórtán framkvæmdir sem eru fyrirhugaðar á svæðinu. Margar hverjar hefjast á næsta ári, einhverjar eru ótímasettar og hvað varðar þrjár framkvæmdir ríkir óvissa þar til afgreiðslu á fjárlögum er lokið. 

Dagur B. Eggertsson og Ari Kristinn Jónsson ræddu málið í Bítinu á Bylgjunni í morgun.