Keyrðu umræðu á auði og völdum

Umræðan um flugvöllinn í Vatnsmýri var keyrð áfram á miklum hagsmunum og mikil vinna og peningar fóru í aðra hlið umræðunnar. Þetta sagði Jón Gnarr, borgarstjóri í Reykjavík, á borgarstjórnarfundi í gærkvöldi.

Fulltrúi Sjálfstæðisflokksins spurði borgarstjóra á fundinum hvort hann tæki ekki mark á undirskriftum sjötíu þúsund mótmælenda gegn því að flugvöllurinn færi. Jón sagði málið hápólitískt og sakaði öfl innan Sjálfstæðisflokksins um að hafa tengst mótmælunum gegn lokun flugvallarins með beinum og óbeinum hætti.

Jón sagði pólitíska fulltrúa verða að meta hvað væri sjálfsprottin pólitísk hvöt og hvað væri „manipúlering" í krafti auðs og valds. „Við erum að velta fyrir okkur hvað þurfi margar undirskriftir. Eigum við að gefa eftir í því sem við teljum vera satt og rétt ef einhver er bara nógu reiður og nógu kraftmikill í því að mótmæla því" Eigum við að lyppast niður, þó að við trúum því að það sem við erum að gera sé rétt?? spurði Jón að lokum.