Vertíð lokið í Þörungaverksmiðjunni á Reykhólum

Þangslætti hjá Þörungaverksmiðjunni á Reykhólum er nú lokið á þessari vertíð. Alls voru slegin 14.000 tonn af þara á vertíðinni og framundan næstu mánuði er mjölvinnsla úr hrossaþara.

Öll framleiðsla verksmiðjunnar er seld fyrirfram og er meiri eftirspurn en unnt er að anna. Munu markaðir eins og Japan, Indland og Suður-Afríka, sem lokuðust í kreppunni, vera smám saman að taka við sér á ný.

Í tilkynningu segir Garðar Jónsson, starfandi framkvæmdastjóri Þörungaverksmiðjunnar, að afkoma vertíðarinnar sé vel viðunandi þrátt fyrir að hvorki væri slegið né framleitt mjöl í fjórar vikur í sumar vegna viðhalds. Fjárfest var fyrir nærri 100 milljónir króna í verksmiðjunni á þessu ári. Meðal annars var keyptur nýr stjórnbúnaður og rafkerfi endurnýjað. Þá var fjárfest í verkefnum sem lúta að öryggis-, gæða- og umhverfiskröfum.